منتدي عالمك - بوصلة حياة المرأة,هدفك أيه في الحياة

#بوصلة_حياة_المرأة

علشان تتأكدي إن بوصلة تفكيرك في الاتجاه الصح اسألي نفسك ا
ايه هدفي في الحياة؟
ليه عاوزه أشتغل؟
ليه بشعر بإنعدام القيمة لإني مش بشتغل ؟

ياريت منكملش قراءة غير لما نجاوب على الأسئلة اللي فاتت.

بعد ما جاوبنا على الأسئلة دي عاوزه أقولك حاجة مهمة جدا:
عارفة ليه حرقة القلب اللي بتحسي بيها وأنت بيتقال عنك ربة بيت، ووأنت مش بتشتغلي؟
لإنك حاطة عينك على الهدف مش الغاية

في فرق كبير بين الهدف والغاية

الهدف مثلا
إني عاوزة أدخل كلية معينة..مجرد ما دخلت الكلية فرحت وبعد فترة انتهت الفرحة ونشوة النجاح.
الهدف إني أدخر مبلغ مثلا يشعرني بالأمان في ظل ظروف حياتية ممكن أكون عايشة فيها بتشعرني بانعدام الأمان.
أدخرت المبلغ وفرحت وانتهت لذه الوصول للهدف .

لكن ايه هي الغاية؟
الغاية ببساطة حاجة مش بتنتهي لحد أخر يوم في عمرنا.
الغاية هي الحاجة اللي لما بتكون مش موجودة صح في حياتنا بيبقا عندنا إحساس بالفشل والضياع وإنعدام القيمة.. وده الإحساس اللي معظمكم عبر عنه لما تحاورنا في أول محاضرة.

http://mamietitine.m.a.pic.centerblog.net/barrinha2.gif

على فكرة أنا حاسة بيكم جدا لإن أنا كنت في يوم من الأيام زيكم.

كان عندي الإحساس ده.. طول عمري بحب الشغل وليا هدف إني أشتغل في مجال معين.
الفكرة بعد الزواج أصبح صعب الوصول ليها بل مستحيل كمان.

مع الوقت بدأت فكرة الشغل تقل سيطرتها عليَّ بسبب وجود أولويات أهم (أطفالي) بس برضه وصلت للمرحلة نفسها اللي العضوات قالوا عنها: مفيش مشكلة نقعد في البيت بس نقعد بمزاجنا ومنحسش إننا مجبرين.

http://mamietitine.m.a.pic.centerblog.net/barrinha2.gif

عارفة إن إحساس إنك مجبرة على شيء إحساس مميت وممكن يعمل مشاكل زوجية احيانا،أو كبت داخلي وصمت عشان الدنيا تعدي أحيانا بس كل ده مش هيتظبط غير بحاجتين:

1- إنك تعدلي بوصلة تفكيرك بخصوص الهدف والغاية.

2- إنك تتفهمي وجهة نظر الطرف التاني ومتبصيش للموضوع على إنه كبت وقهر ولكن تتفهمي إنه حب وخوف عليك في ظل واقع العمل المُزري اللي مجتمعاتنا فيه حاليا.. بس للأسف التفهم ده مش بنوصل ليه غير بعد سنوات النضج.

http://mamietitine.m.a.pic.centerblog.net/barrinha2.gif

ده يرجعنا لتعريف الغاية

الغاية حاجة مش بتنتهي يعنى كإنَّه هدف مستمر في الزمن وده التعريف المتداول ليه
بس أنا ليا تعريف تاني وهو إن الغاية هدف مستمر حتى بعد اخر يوم في عمرك.

الغاية عند المسلم الوصول لرضا الله عز وجل وترك اثر ليه بعد رحيله يكون سبب في دخوله جنة الفردوس والوصول للسعادة الأبدية

يبقا المفترض إني أسخر كل اهدافي للغاية دي.

لما نعدل بوصلة نيتنا مش هيفرق معايا إني أكون ربة بيت ولا دكتورة لإن نيتي مش الناس تتكلم عني حلو وتنظر لي نظرة تقدير عشان وظيفتي ولكن نيتي إني يكون ليا دور في الحياة سواء كنت دكتورة أو مدرسة أو ربة منزل.. يعنى هكون دكتورة عشان الغاية.

http://mamietitine.m.a.pic.centerblog.net/barrinha2.gif

طيب حد هيقولي ما احنا لينا حق نشتغل ونفرح بشغلنا
أنا مش معترضة ومش بقولك متشتغليش

أنا بقولك إن إحساسك بقيمتك مش سببه الشغل لإني شفت كتير منهم الدكاترة والمهندسين ومنهم اللي في مراكز كبيرة ومديرات واحساس الشعور بانعدام القيمة عندهم عالي جدا.

يعنى أنت ممكن برضه تشتغلي ومازلت بتحسي بانعدام القيمة وعدم التقدير الذاتي
عارفه ليه؟
لإن عينك مش على الغاية ..بوصلتك في اتجاه غلط

السبب التاني إن تقديرك لذاتك بتاخديه من كلام الاخرين عنك
وده اللي بيوقعنا في فخ الشعور بالدونية وانعدام القيمة.

http://mamietitine.m.a.pic.centerblog.net/barrinha2.gif

فرق بين إني أكون عاوزة اشتغل عشان صحبتي اصبحت دكتورة وبنت عمي مهندسة وجارتي مدرسة وبين إني عاوزة أشتغل عشان عاوزه أسيب أثر ينفعني بعد رحيلي عن الحياة الاثر اللي كل ما بعمله واشوف تأثيره على الناس بحس باني فخورة بذاتي..

اني مش منتظرة كلمة من حد ترفعنى لفوق ولما يتقال عكسها أنزل لسابع أرض.

أنا لما عدلت بوصلة تفكيري من كام سنة وصلت للمرحلة دي.
إني قاعدة في البيت برغبتي لإني مبقتش أشعر بقيمتي أبدا من خلال الشغل ولكن من خلال أثري

أنا بعد فترة اشتغلت بالفعل بفضل الله في مجال بحبه ومفيهوش اختلاط ويرضا الزوج وتشجيع منه لإنه مجال مفيهوش حاجة ممكن تسبب لي مضايقات، ومجال ده كن بيرضيني جدا وكنت لاقيه فيه نفسي جدا جدا كمان بس بعد فترة قعدت بنفسي واصحاب المكان حاولوا يرجعوني أكتر من مرة.

واتعرض عليا الشغل في مكان تاني يحقق ليا رضايا عن نفسي وبفلوس كتير الحمد لله بس انا رفضت ومطرحتش الفكرة أصلا للتفكير في ذهنى أو للنقاش.

عشان أنا عدلت بوصلة تفكيري
بصيت للغاية الكبرى
للهدف المستمر في حياتي وما بعد حياتي
سألت نفسي:
هو الشغل ده هيوصلني للغاية اللي عاوزاها ولا لأ ولو هيوصلني هل في حاجة توصلني أفضل منه وتتناسب مع أولوياتي في الحياة، ومتأثرش على بيتى وأولادي؟
ووقتها لما جاوبت بصدق على السؤال قدرت أحط أقدامي على الطريق الصح.. أنت كمان لما هتفكري في الموضوع بشكل أكثر موضوعية، هتتضح لك حاجات كتير أوي كانت مختفية عنك.

رضا الجنيدي

#بوصلة_حياة_المرأة

كلنا راحلون ويبقى الأثر.. فلنترك أثرا قبل الرحيل.