منتدي عالمك - فراخ مشوية زي المحلات،طريقة شوى الفراخ زى الكبابجى،طريقة عمل الفراخ المشوية على الفحم بالصور

https://www.iltelaiodipenelope.it/ma...5422_aIMc7.gif
فراخ مشوية زى المطاعم ، طريقة عمل الفراخ المشوية على الفحم للشيف شربينى ،
تتبيلة الفراخ المشوية بتاعة المحلات ، طريقة عمل الفراخ المشوية زى الحاتى ، طريقة عمل الفراخ المشوية على الفحم عالمك

إزيكم حبيباتى النهارده عملت فراخ مشوية فى الفرن ماشاء الله جميلة وأحلى من الجاهزة
دلوقتى هقولكم على شوية تكات علشان النتيجة تكون مرضيه إعذرونى مفيش إلا الصورة النهائيه
بس بإذن الله الشرح هيكون مبسط

https://www.iltelaiodipenelope.it/ma...sori/fffff.gif
أولا فرخة حجم مناسب للشوي كحد أقصى كيلو بعد التنظيف وممكن تقطعيها وممكن تخليها زى ماهى
أنا هنا خليتها زى ماهى بحب شكلها كده
للتتبيلة / بصلة كبيرة / فصين توم / طمطمايه / معلقة كبيرة زيت /

معلقة كبيرة زبادى أو لبن رائب لتطرية اللحم (أول تكة )
هنضرب كل المكونات دى فى الكبه لغاية ماتنعم بعد كده هنتبل بيها الفرخة المغسولة كويس بالدقيق والملح
والمصفاة أو المجففه بمناديل المطبخ وهندخل التتبيلة تحت الجلد وجوه الفرخه بعد كده هنشيلها فى التلاجة
أقل حاجة 6 ساعات وأقصى مدة يومين (تانى تكة )
قبل الشوى بساعه أو ساعتين هنطلع الفرخة من الثلاجة علشان تبقى بدرجة حرارة الغرفه لازم (تالت تكة )
هنحضر مجموعة توابل أنا إستخدمت ملح / فلفل / زعتر ناشف بيخلى الفراخ تحفه / كمون / شطة أو بابريكا حسب الرغبه
قبل مانضيف التوابل للفرخه هنصفيها كويس فى مصفاه أو نشيل التتبيلة من عليها بعد كده نتبلها بمجموعة التوابل اللى حضرناها من جوه وبره وتحت الجلد نعملها زى تدليك والتكة اللى هنا هى إننا محطناش التوابل فى الأول مع البصل والطماطم لا دى بتتحط فى الآخر قبل الشوي بربع ساعه والحكاية دى بتخلى طعم الفراخ حلو ومركز لكن لما بتتحط فى الأول بتروح فى البصل والطماطم (رابع تكة )
نسخن الفرن على درجة حرارة عالية أعلى حاجة قبل ماندخل الفراخ (تكة خامسه) نحط الفرخة الشواية الستيل بتاعة الفرن وطبعا هى سخنة وده بيخلى الفرخة متلزقش أبدا ونحط تحتها صينية تحت الفراخ وعليها ورقة فويل علشان الدهون اللى بتنزل من الفرخه
أو ممكن نستعمل سيخ الشوى الدوار أو زجاجة بيبسى فيها مايه أو حامل الفراخ اللى يريحك
هنشغل الشواية والفرن مع بعض لو الإتنين مش بيشتغلوا مع بعض شغلى الفرن بس
الفرخه بتاخد من ساعه لساعه وربع وبتتحمر وبتبقى زى الفل من غير ماأقلبها خالص
بعد كده أخرجها من الفرن وأولع فحمه وأحط عليها نقطة زيت وأغطى كويس بالفويل علشان تاخد ريحة الشوى بالنسبة للفحم أنا بستعمل فحم مكعبات المكعب على أد المرة وبيترمى عجبنى علشان مش بضطر أكسره لو حجمه كبير وإيدى تتبهدل ودى صورته للى حابه تشتريه هو فى الأساس خاص بالمبخرة
https://up.3almc.com/uploads/3almc.c...3850877924.jpg
هسيب الفراخ متغطية ومرتاحة مدة نص ساعه قبل الأكل (تكة سادسة )

ده بيساعد جدا فى إن السوائل تتجمع فى الفراخ وتبقى طرية والموضوع ده بينطبق على أى مشويات لازم ترتاح بعد الشوى نص مدة الشواء
يعنى لو إتشوت فى ساعه ترتاح نص ساعه وهكذا
ودلوقتى مع الصوزة النهائيه بجد طعمها حلو جدا وخفيفه مووووت ولاكإنك كلتى حاجة وسهلة
https://up.3almc.com/uploads/3almc.c...3850846531.jpg
ودى من الظهر شايفين متحمرة إزاى من غير ماأحركها من مكانها أنا مكتفاها لفيت الجناح عكس عقارب الساعه
https://up.3almc.com/uploads/3almc.c...6385085012.jpg

https://up.3almc.com/uploads/3almc.c...3850863883.jpg
يارب موضوعى يكون عجبكم

https://www.iltelaiodipenelope.it/ma...5422_aIMc7.gif