منتدي عالمك - فكرة سهلة و بسيطة اتبرعى بزبالة البيت،كل حاجه مش عايزها اتبرعى بيها

http://up.3lmik.com/do.php?img=66
حبيباتى هى فكرة سهلة و بسيطة جدااا و مش حتكلفك اى شئ تبرعى بزبالة البيت ايوة زبالة البيت اللى انتى بترميها فى الباسكت بصى يا حبيبتى احنا نفذنا الفكرة فى الشارع عندنا الفكرة ايه هى بقى
انا عندى باسكت للزبالة طبعا و كلنا كدة عملت ايه بقى جبت كيس فاضى و بقيت احوش فيه الزبالة زى منتجات البلاستيك و الكرتون اللى بنستعملهم فى البيت يعنى زجاجة زيت فاضية او زجاجة خل بلاستيك او زجاجة فانتا او كوكاكولا او اى زجاجة بلاستيك اطباق بلاستيك او كوبايات الزبادى الفاضية او علب التونة و السمنة الفاضية او اى حاجة كرتون عندنا او ورق زى كرتونة بيض فاضية او علبة دواء فاضية كرتون
و احيانا بجيب وجبات من كنتاكى و طبعا الوجبة بتكون فى علب كرتون مترميهاش حطيها فى الكيس و بعدين لما تجمعى شوية حلوين حنعمل ايه حنوديهم المسجد ايوة المسجد طبعا احنا عارفين ان الزبالين بياخدوا الزجاجات البلاستيك و الكرتون و بيبعوهم للشركات احنا بقى حنتبرع بيهم للمسجد و المسجد يبيع محتويات الاكياس من منتجات بلاستيك و كرتون وورق المسجد يبيعهم و الفلوس اللى تيجى منهم تتفرق على المحتاجين احنا عندنا هنا فى الشارع نفذنا الخطة دى و طبعا كل المحلات اللى كانت بترمى الزبالة زى كراتين الشيبسى و كراتين المكرونة و خلافه المحلات بتودى كل دة للمسجد و الصيدليات بتودى علب الادوية الفاضية للمسجد و احنا كمان فى البيوت بدل ما نرمى الزجاجات الفاضية فى الباسكت ارميها فى كيس جانبى و لما يتملى وديها المسجد
بس طبعا بعد الاتفاق مع شيخ المسجد و بكدة نبقى بنتبرع بالزبالة و تتباع و بتمنها بتتفرق على المحتاجين
ها ايه رايكم و الله فكرة حلوة جدا و شارعنا مبسوط اوى اننا بنعمل كدة انا حبيت اقول لكم على الفكرة البسيطة دى يمكن تعجبكم و ربنا يجعله فى ميزان حسناتنا جميعا
و ادعوا لى ربنا يكرمنى خيرhttps://vb.3lmik.com/images/smilies/asmaile(35).png
http://up.3lmik.com/do.php?img=66