اللي بتضحي مرة بتعيش طول عمرها تضحي
في فتره كنا بننزل نجيب حاجات الشهر كلها علي بعضها في يوم واحد خاصة الحاجات اللي بينفع تتخزن ومن ضمنها كيكات وبسكوتات للاولاد
لاحظنا حاجه ... ان الحاجه لما بتبقي كتير قدامهم وسهله اولا بيتبطروا عليها ثانيا بيهدروا فيها كتير اللي ياكل قطمه ويسيب الباقي يبوظ واللي يفتح واحده ويسيبها تنشف

نفس الكلام بينطبق علي كل حاجه حوالينا .. المشاعر والوقت والفلوس وحتي الجدعنه .. لو اسأتي استخدامهم وغرقتي بيهم اللي قدامك بيهدرها ويسئ استخدامها ويعتبر انها حق مكتسب بعد كدا
احنا كدا البشر كدا

واوعي تفتكري انك كل ماتدي وتضحي ده بيزود رصيدك عند اللي قدامك .. اطلاقا
انتي بس اللي بتحسي بألم التضحيه وانتي بس اللي بتعيشي فيها .. ماحدش هايتخيل انك ممكن تاخدي من اساسياتك عشان رفاهياته
انتي اللي بتذبلي وتضعفي وتقعي ويوم ماتيجي تسندي عاللي سندتيه كتير اوعي تتفاجئي انك سندتي علي هوا واوعي تتفاجئي برد فعله ... هو اتصرف بمنتهي الاريحيه ماجاش علي نفسه ولا ضغط عليها عشان حد وكل واحد حر في الطريقه اللي يتعامل بيها (ده منطقه) وماحدش ضربك علي ايدك

وخلي بالك اللي بتختار تضحي من الاول بتفضل عايشه كدا طول حياتها
البوست مش اناني ده خلاصة تجارب ليا ولناس كتير حواليا في علاقات مع الاخوات او الاصدقاء او الاهل او الزوج
اعرفي امتي تدي وامتي تسحبي نفسك
حبي_وضحي_واعطي_بسخاء_لكن_بذكاء وخدي حقك قصاد عطاءك ده .. مفيش علاقه متكافئه قائمه علي العطاء فقط او الاخذ فقط لازم يبقي فيه عطاء يقابله اخذ يعني من الاخر هات وخد ... ريحني واريحك
والعلاقه اللي بتقوم علي صفه واحده من دول بتبقي علاقه انانيه طرف واحد فيها بس اللي بيبقي مرتاح