منتدي عالمك - مفهوم تحويشة العمر

شايله فلوس او دهب على جنب؟...طب شايلاهم لايه؟....لوقت عوزه؟....احساس بالامان؟.......مش عاوزه تحتاجى لحد؟.....طبعا لازم تشيلى ..ده انتى لو معملتيش حساب بكره تبقى عبيطه وخايبه.....

فاكره الشعور بتوع الناس التقيله اللى كنتى بتشوفيهم فى الكليه او المدرسه...مين فينا مكنتش عبيطه و عماله تتكلم انها ذاكرت المذكره الفلانيه و حفظت كذا ..و اللى قدامها بتسمع منها و ساكته...و بعد النتيجه تكتشفى انك ناقصه على كام غلطه و هى اللى مقفله...على فكره هى مش لئيمه......هى اشتغلت بذمه ..يس فى صمت ..مالهاش فى البلالين و المفرقعات...

مين من قريباتك فوجئتى بانها جابت شقه و لا كانت قايله اى كلمه ( وده حقها على فكره)..ناس كتير مركزين على هدفهم ...ومش فاضيين للكلام....و ساعتها بتكتشفى انك عبيطه اوى ...

انا بقالى فتره ...غيرت سياستى خالص فى التعامل ....
انا مش صغيره زى معظمكم ...انا فى الاربعينات ...عندى خبره و تجارب و تعاملات اكتر منكم ...غير انى باحب اوى اوى اتامل الاحوال و اسمع التجارب ...

محدش فيكم ممكن يكون غيّر من نفسه ادى....معنديش بفضل الله اى غضاضه انى اتعلم من اى حد ...حتى لو كان اقل منى خبره او اصغر منى...مش باتكسف اسأل عن اى تفاصيل تطلعنى عبيطه قدام حد....فى الكليه كنت باسأل اسئله هبله اوى و كان زمايلى بيتريقوا ..و بعدين احترمونى جدا لما طلعت الاولى عليهم.....

مؤخرا ...غيرت سياستى بانى بقيت اشيل حته على جنب ...تحويشه فى السر ...مش حتبان و لا حد حيحس بيها بس حتنفعنى و قت ما احتاجها ...ومش باعد ...معرفش عندى كام ...عاوزه اتفاجأ بالانجاز ....

فلوس ؟...لا و الله ما باتكلم على الفلوس ...

باتكلم على تحويشة العمر الحقيقى؟...انا على يقين صادق فى قلبى ...ان العيش الحقيقى ..هو عيش الاخره....و انى لازم احوش تحويشه محترمه...ده يوم...حيوصل من قوته انى اشوف بنتى و متهمنيش ...ايه نوع االشده اللى اشوف فيها بنتى اللى هى حته منى و اسيبها و ممسكهاش...ومهتمش بيها .....

حسيت انى مرتبه امورى صح فى حياتى .....لكن معنديش تحويشه لليوم ده ....محدش يقولى الصلاه و الصيام و الحج ...دول قال عنهم النبى صلى الله عليه و سلم ( بنى الاسلام على خمس.)..يعنى دول الاساس ...اللى البنايه حتطلع عليه...فين البنايه....و الآيه بتتردد فى ذهنى و شاغلانى اوى ...(أَفَحَسِبْتُمْ أَنَّمَا خَلَقْنَاكُمْ عَبَثًا وَأَنَّكُمْ إِلَيْنَا لَا تُرْجَعُونَ (115))

بدأت احوش...على جنب ...حاجه كده ...ليوم تشخص فيه الابصار...عاوزه اكون فى مأمن ...و بدأت الممارسات الفعليه ..لتحويشة العمر دى....

من فتره و انا اى ظلم بيقع عليا او جرح باتجرحه...مش باتكلم و لا باشتكى ..و حتى لو ظهر للناس ان الطرف الاخر اللى بيتكلم على حق ...مش بدافع...مش خيبه و لا سلبيه...ده احتساب..لغه ارقى بكتير من انها تتفهم لاى حد عادى ..ثم اشتكى و اتحاكم مع مين..مع مخلوق؟؟؟.....
انا فهمت الى حد ما ....الامام ابن القيم و هو بيقول ا(نا جنتى و بستانى فى صدرى)...مرحله من مراحل التصالح النفسى و الارتباط بخالقى مش اى حد يقدر ينولها بسهوله..(معية الله )...يعنى ربنا شايف قلبك... وقلبك متونس بصحبته عز وجل..و حصلك اكتفاء ..لسه بدرى اوى عليا اوصل للمكانه دى طبعا...انا باشم فيها من ....بعيد بس ...و نفسى اوصلها.....
انا كده باشيل حقى على جنب فى الاخره...تخيلى بقى حد ظلمك و يضطر يشيل من حسناته و يديكى فى وقت عصيب زى ده..او ياخد من ذنوبك و يشيل....طب بالله عليكى ...عمرك شفتى تحويش على جنب و استثمار احسن من كده....

#مش_ممكن_نتساوى
شفت و عاشرت ناس فى سباق محموم...عاوزين يستغلوا كل لحظه فى عمرهم فى ثواب وطاعه...مره باكلم واحده عن عمل جميل هى عملته..و باقولها انا نفسى اقدر زيك اعمله لانى اعرف انه فرض...قالتلى ولا شغلت بالى هو فرض و الا سنه...انا عرفت ان ربنا بيحبه ...فعملته....وحعتنى الكلمه اوى.....و انا تايهه بين الاراء ياترى العمل ده فرض و الا سنه و هى راحت من غير حسبه قالتله عملته يارب ...حبا لك....يااااااااه..هى مليونيره و انا مفلسه.....فكم بيننا ....

#افضلى_ضيعى_فى_وقتك
خيبه دى و الا مش خيبه لما يبقى حيلتك 24 ساعه زى الناس دول و انتى تحت رحمة ا زرار الريموت يوجهك من مسلسل تركى لاعلان طالع جديد....
انا بفضل ربى بقالى سنين معرفش اى حاجه عن التلفزيون...نهااائى ..ومحصليش اى حاجه غير انى وقتى بقى اكبر و بركته زادت...اخترت اللى عاوزاه من النت لو احتجت...و مجاليش تخلف و لا ضعت ...صحيح ممكن مفهمش افيهات و مصطلحات بيضحكوا عليها بس ياعرفها بعد كده و اتجاوب....ولو معرفتهاش ...حيحصل ايه يعنى ..الوقت اللى كان ممكت يروح عليا...حاحوشه..والارباح حترجعلى دنيا و اخره ان شاء الله....

أعجبتني فنقلتها