منتدي عالمك - لو فاهمه ان الدنيا و الاخره دونت ميكس تعالي

فاهمه ان الدنيا و الاخره ...دونت ميكس...و ان حياة العابد الذاكر ....حياه لام تكون كلها زهد وحزن و تجرد و عذاااب ...قسمىها صح..وقت الشغل شغل بجد... ووقت الراحه و الفرفشه باخد حقى تالت و متلت...اذا جددتى نيتك ان العمل خالص لوجهه...تقدرى وقتها تمارسى مهام الدنيا للاخره ...يعنى العمل بتاعك يبقى ملّمس دنيا على اخره...والامثله كتير اوى ...ابسطهم انى أسمى الله و اشمر وابدأ كل يوم اقول لوجهك يارب النهارده حاحط قالب جديد فى بناء صرح اولادى ...النهارده لازم يطلعلوا بحاجه جديده....واستمتعى بالحصاد فى الدنيا و الاخره...

#طب_اعمل_ايه
اسمعى نصيحتى ..وخدى البهريز ..اتعبى هنا علشان ترتاحى هناك...و احرمى نفسك من متع عبيطه...حتبقى ملكه بعدين....ومتخليش حد يستدرجك لمعصيه ..مهما كانت شايفاها هينه..مجاملاتك فى الغيبه و النميمه ..نازله معاكى قبرك لوحدك...لو قدها ...اتكلمى يا ستى و اغتابى براحتك و سيبى لسانك....

#النية
فرق العاده عن العباده...(النيه)...كلنا بنطبخ...بس اطبخ عاده؟...الا اطبخ طاعه لربنا... بيتى يبقى مأوى دافى يعمر و يطمن المسلمين..واولادى و ضيوفى.... واولادى يتغذوا صح و جسمهم سليم يأدوا ادوارهم فى طاعة الله اطباء و مهندسين .... وزوجى اسعده ويتقوى على شغله...

#عينك_رايحه_فين
تأملى اللى حواليكى ,,,محدش عنده حاجه زياده عنك...كلنا واخدين ال 24 قيراط...لو اتعرض عليكى تبدلى ...لما تشوفى حياة الناس التانيه بتفاصيلها ...حترفضى ...ربنا عدل ...و لا يكلف الناس الا وسعهم ....باقولك كده علشان متمشيش فى المنافسات المحمومه بين الستات ....كلنا عارفين مارثون السلايف و الجيران والقرايب .....دة ابنها دخل مدرسة كذا و عربيتها موديل كذا و انا عيب اظهر اقل منها ..لا...انت بتعيشى حياتك..مش داخله مسابقه...استمتعى باللى عندك من النعم ....وان كنتى داخله سبق... يبقى ركزى على اللى قال فيه ربنا ( وَفِي ذَلِكَ فَلْيَتَنَافَسِ الْمُتَنَافِسُونَ)..تنافسى على رحيق الجنه...مش على تلوث الدنيا وزحمتها...

#متبعديش_عن_بابه
كلمى ربنا كتير ...بلغتنا البسيطه.. ......فين وريدك ؟.....هو أقرب.....
اشتكى...لو الملح نقص فى بيتك ...قوليله عز وجل...لو بلوزتك اتقطعت اطلبى عونه قبل ما تخيطيها...لو ابنك وقع قوليله اشفيه قبل ما تجرى تشوفى رجله حصلها ايه ...خلى وصلك بربنا محطه اولى و تنطلقى بعدها....و قيسى على كده فى الصغيره و الكبيره...ربنا مش رب الشدائد بس...رب كل شئ و مليكه...احنا اللى بنبعد ...و منلجأش و لا نركز الا فى المصايب و وقت التعب...لكن وقت الراحه بننسى و نبعد و نرجع نقول احنا ليه تعبانين نفسيا...(وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَىٰ)

#خليكى_عصفوره
خلى رضا الله محور سؤالك دايما؟...العمل ده حيرضيه و الا حيغضبه...لو حيرضيه حاعمله حبا له...و لو حيغضبه.انا مش قد عقابه....و امشى بالطريقه دى....الخوف من عقابه...و الرجاء فى رحمته....خوف و رجاء ....اوعى تمشى من الجناحين دول ...ما ينفعش تطيرى الا بيهم ...

اوعى تفتكرى انى مثاليه....و ان ابليس ما بيشتغلش عليا......لا و الله ده انا بانصح نفسى قبلكم ...انا بس بحاول ابقى كويسه...لكن لسه مبقتش....باحاول....باجاهد نفسى .....و اسجد واقوله... أغثنى و نجينى ....

هى حقيقه واحده كل ماتتعبى ..ردديها....

دوام الطرق على الباب ...حيفتحه......و انتى بتسألى أكرم الاكرمين...

جددى النيه و شدى العزم ...
.....
....
...
..
.
وشيلى حاجه على جنب....

بحبكم فى الله
منقول
اللهم اجزى من كتبتها خير الجزاء