نصائح غالية لكل عروسة ،نصائح للعرائس قبل الزفاف،نصائح جديده لكل العرائس

السلام عليكم ورحمة الله وبركاته


"عروسة 2018"، علشان كده أحب أقول لأي بنت فرحها قّرّب ونفسها تبقى أجمل وأحلى في يوم فرحها..

اولا

لازم تكوني واثقة من نفسك في اليوم ده جداً، وتخليكِ على طبيعتك قوي، وتبتسمي على طول، وتثقي في كل خبراء التجميل والأزياء اللي هتتعاملي معاهم في أحلى يوم في عمرك وهو يوم زفافك، اليوم اللي بتحلمي بيه وبتفكري فيه من وأنت صغيرة.

ثانيا



رتبي أفكارك واحتياجاتك قبل الفرح بـ3 شهور على الأقل، وخصوصا لو فرحك في الصيف أو في الأعياد، عشان أماكن الأفراح في الأوقات دي بتبقى زحمة جداً وعلى فكرة المفروض ترتبي نفسك من أول الفستان لغاية القاعة اللي هيتعمل فيها الفرح وبعدين شكل المكياج والطرحة.

ثالثا

الرشاقة هي الحاجة المهمة اللي بتفكر فيها العروسة وعلشان الفستان يبقى حلو ومظبوط عليكِ أنصحك لو وزنك زيادة شوية تتبعي نظام غذائي قبل الفرح على الأقل بشهرين، وإن وجباتك تكون بتحتوي على كل ما هو صحي ومفيد وبلاش الوجبات السريعة لأنها ممكن يكون لها تأثير كبير على بشرتك، كمان ممكن زيادة الملح أو السكر تظهر حبوب كتير في أماكن كتيرة في وشك وجسمك وخصوصاً لو كنت من الناس اللي عندهم حبوب أو استعداد للحساسية ويا ريت لو لقيتي أي حبوب ظهرت في بشرتك تروحي لدكتور جلدية عشان يشوف بشرتك ويقدم لك العلاج المناسب.

رابعا

لازم تهتمي ببشرتك قبل الفرح بفترة كافيةوتستخدمي ماسكات وزيوت طبيعية عشان يبقى جلدك ناعم وجميل زي بشرة الأطفال، والمفروض إنك تسيبي شعر الجسم قبل الفرح بشهر ونصف تقريباً وشعر الوش قبل الفرح بأسبوعين عشان يبقى سهل عليكِ إزالته بسهولة قبل الفرح.

خامسا

خلي بالك من أسنانِك كويس، عشان دي أول حاجة بيشوفوها لمّا بتضحكي في الفرح، وياريت تروحي لدكتور أسنان عشان تنظفيها قبل الفرح بأسبوع ولو عندك مشكلة فيهم لازم تصلحيها قبل الفرح بشهر على الأقل.

سادسا

كمان الاهتمام بالعين حاجة مهمة جداً وده لأن العين هي اللي بتبين جمال الوجه علشان كده يا ريت تحاولي تنامي كويس قبل الفرح بأسبوع أنا عارفة إنه صعب بس حاولي، ولو هتلبسي عدسات ملونة أو نظر يبقى لازم تشتري واحدة جديدة قبل الفرح ومتنسيش القطرة ممكن تحطي "فايزين" أو" بريزولين بلو" قبل الميك آب، علشان القطرة بتساعد إن العين متكونش حمرا في الفرح.
سابعا

بالنسبة للمكياج والطرحة فدول بيكونوا أهم حاجة بتفكر فيها العروسة المحجبة... أما العروسة غير المحجبة فبتبقى قلقانة أكتر على شكل تسريحة شعرها هتبقى عاملة ازاي؟!، والاتنين عايزين يعرفوا الشكل النهائي في الفستان وفي كل حاجة في الفرح وطبعا كل حاجة من الحاجات دي هنتكلم عليها بالتفصيل في حلقات قادمة إن شاء الله...

بس بصفة عامة ياريت تختاري متخصصين سواء لتصميم أزياء فستانك أو خبيرة تجميل لمكياجك وشكل طرحتك وتكوني واثقة فيهم جداً وعندك حد مجربهم قبل كده من العائلة أو من أصحابك أو شوفتي شغلهم في الصور أو في فرح حضرتيه وعجبك شكل العروسة.

ثامنا
حاجة تاني مهمة جداً هي التصوير وتفكيرك فيه لازم يكون جد جداً لأنك بتخرجي من الفرح كله بالصور والفيديو لأن اللي هيفضل معاكي طول العمر هو صور الزفاف وصور الفرح، والمفروض إنك تشوفي شغل المصور عشان تحددي الصور اللي عايزاها وبتحلمي بيها طول عمرك.

تاسعا

لازم تعملي شنطة صغيرة تحطي فيها أدوات تجميل بسيطة زى مثلاً بارفان وشراب وإبرة وخيط أبيض ومقص صغير ومانيكير وأسيتون وقطن ومزيل مكياج وكريم مرطب، احتياطي عشان ممكن تحتاجي لهم أثناء الفرح، وكمان ممكن تستفيدي بيهم بعد الفرح إن شاء الله.

فرحك من شخصيتك


لازم تعرفي شخصيتك نوعها إيه؟! قبل ما تتعاملي مع أي متخصص في المكياج أو في الشعر أو حتى في الفستان فمثلا فيه شخصيات كلاسيك وشخصيات مودرن شوفي أنت مين فيهم واعملي فرحك من شخصيتك.... هقولك إزاي: